$1蚊雞租露營車環紐西蘭
前幾日有三個中國女仔喺紐西蘭坐巴士去旅行，紐澳地大，巴士一坐就幾個鐘，有時十個鐘都可能，䀫一下在所難免，不過一䀫就唔知去咗邊，大好假期換來一殼眼淚。
紐澳租露營車其實別有一番風味，可以感受大自然之餘，最緊要係自由、時間任你控制，今日訓晏咗，咪最多跳走無關痛癢既行程，去旅行由你話事咁先夠過癮，邊個話香港人奴性？係無機會發揮姐。
香港又邊有機會揸住咁大架車環島遊，仲要一班人嘻嘻哈哈圍威喂上路去？呢啲經驗唔係咁易買得到。
不過出發前其實都幾猶疑要揀邊間公司，喺紐西蘭有唔少出租露營車公司，最大路就係Jucy，其他仲有Maui以及Britz，由於Jucy多優惠，價錢大眾化，係慳家之選！Jucy有時更會有回廠車優惠，只要你幫手將車由某點揸回去，$1租車都有可能。租車前一定要望一望，慳到盡！
Camper van 同 Caravan van有咩分別？
車型方面都有兩種，包括Camper van 同 Caravan van，兩者分別係大同細，前者係改裝既客貨車，內裡別有洞天，有兩層可以畀人訓，車尾有個小「廚房」。至於Caravan Van就好似Walking Dead第一集Dale架車一樣，係一架真真正正露營車，有得沖涼煮飯同訓大床。價錢當然亦會有分別。揀車同時亦要睇下耗油量同馬力，仲有細閱租車條款。好似Campervan 有個便攜廁所，係要清潔返先還車，如果唔係就哼哼哈哈！
另一樣就係揸慣細車既人可能唔習慣高身車，雖然喺紐西蘭唔多室內停車場，但千祈要留意返高度限制。
講到意外大家都唔想，不過保險真係唔慳得，試諗下喺嗰邊整車隨便換下油都收你一百，講緊係紐紙，你要整車係幾貴自己想像下，所以車保唔慳得架！
最後提返大家，見到有揸Jucy既朋友記得要揮下手喇。
留言
張貼留言