秋季旅行之西九文化區公園
秋風送爽，想親親大自然，又唔想行山咁操勞，可以考慮下西九文化區。最近因爲參加樹木導賞去左個度。無去好耐，變左好多，個時邊有苗圃公園？係靠海邊你會見到好大個招牌寫呢度係WEST KOWLOON。而家入口位係西隧旁邊。想知點去可以click 入下圖，瀏覽資料。
話說囘頭，西九同時舉行“自由約”活動，有好多手工藝攤檔擺賣，有懷舊手作坊，不過店主好守規矩，話兩點先開始。每個月第二個星期六，日都有“自由約”，但每次主題都唔同，不失爲一個假日活動。
▲用木條做架，橡根推動螺旋槳嘅模型飛機，係香港好難搵，竟然係免費手作坊見到。
開揚維港景觀係殺食，不過開揚地方曬起來就不太適合城市人。而加有秋風去先最好，大片草地就相對少啲樹，但附近會有頂帳篷，海濱旁就有太陽傘長檯，去野餐一流。
苗圃有好多樹，不過都係圍好泥膽嘅幼樹，香港對樹木日益關注，不妨上網報名參加苗圃公園樹木導賞及工作坊增進樹木知識。苗圃分四區，想睇本地本種如楓香，木油樹可到林地區；海濱樹種如欖仁樹，假蘋婆可到海濱區；觀景樹如法國梧桐，黃花風鈴木，花葉欖仁可到城市森林區；果樹如火龍果，楊桃就可到果園區。不過最有趣係導賞義工指指草地，原來有野生嘅害羞草！對上一次見害羞草已經係盆栽植物。導賞妹妹話野生害羞草嘅花係紫色帶小刺，盆栽害羞草係白色無刺。
▲導賞義工都係讀園境嘅學生，同佢地傾計，你會感受咩叫passion！
留言
張貼留言